Bilärdä mäglümati texnologiyalärgä bagışlangan smena tämamlandı ← kire kaytirga
24 iyul könne XIII Xalıkara «Sälät» yaşlär uku-ukıtu forumınıñ dürençe smenası – Mäglümati texnologiyalär Bilär Forum (Informatsionnıe texnologii / Information Technologies) tämamlandı. Tıgız cide kön eçendä katnaşuçılar tsifrlı dönya belän tanıştı, IT-ölkädä praktik häm teoretik belemnär tupladı.
18 iyuldän alıp 24 iyulgä kadär bargan forum mäglümati texnologiyalär keşe tormışınıñ böten ölkälärendä dä möhim rol uynawına ışanuçılarnı berläşterde. Biredä respublikanıñ törle töbäklärennän 800 gä yakın bala katnaştı.
Räsmi yabılu tantanası 23 iyul könne traditsion räweştä «Sälät» yaşlär üzäge direktorı Aygöl Gabdraxmanowanıñ sälamläü häm räxmät süzlärennän, Sälät älämen töşerüdän häm yomgaklau kontsertınnan tordı. Kontsert balalarga icadi sälätlären kürsätü öçen yaxşı mömkinlek buldı.
Forumnıñ alıştırgız öleşen uku-ukıtu programması alıp tordı. Här kön balalar ike sägat wakıt eçendä törle ostaxanälärdä katnaştı. Mäglümati texnologiyalär Bilär Forumı kısalarında geymifikatsiya aşa forumnıñ töp yunäleşlären: IT häm mägarif, IT-trendlar, IT häm biznes, digital-hönärlär açuçı profille ostaxanälär häm uku-ukıtu mäydançıkları gamälgä aşırıldı. Ostaxanälär arasında «Kreatiw fikerläü», «Proektlar menedjmentı: ısullar häm korallar», «Industrial proektlar: ideyadän alıp başlap cibärügä kadär», «Neyroçeltär uenı», «Startapta gipotezalarnı niçek tikşererep kararga häm üsärgä» h.b. Ostazlar – yugarı uku yortları mögallimnäre, IT-yunäleştä aktiw eşçänlek alıp baruçılar.
Däreslärdän tış belgeçlär katnaşındagı diskussiya mäydançıkları balalarnı mawıktırgıç tsifrlı dönya häm eşmäkärlek yunäleşe belän tanıştırdı. Smenada forum kısalarında el saen ütkärelä torgan maxsus «EkoSälät» proektı gamälgä aşırıldı. Anıñ kısalarında «Ekologiya» temasına bagışlangan lektsiyalär, ostaxanälär, treninglar, uennar häm başka çaralar ütkärelde.
Xalıkara «Sälät» yaşlär uku-ukıtu forumı balalarnı fizik häm intellektual yaktan da üsterä. Smena programmasında kön dä sport yarışları häm turnirlar, kiçke çara wakıtında intellektual häm icadi uennar buldı. Şulay uk soñgı kön uza torgan yomgaklau kontsertına kasting häm repetitsiyalär bardı. Forumda här bala üze telägän yunäleştä şögıllänsen öçen barlık mömkinleklär dä tudırıldı.
Smenada katnaşa almagannar isä «Canlı Sälät» turı efirlar studiyasen küzätep bardı. 22 iyul häm 23 iyul könnärendä Sälätneñ WKontakte häm YouTube räsmi akkauntlarında bargan translyatsiyalär härkemne cılı moxit tulı Bilärgä alıp kayttı. Ul efirlarnı xäzer dä räsmi akkauntlardan kararga mömkin.
Kiläse smena – Media Bilär Forum (Media). Ul 27 iyuldän alıp 2 awgustka kadär Bilär tarixi-arxeologik muzey tıyulıgı territoriyasendä uzaçak. Ul smena sotsial mediaresurslar belän eşläü öçen kiräkle bulgan aktual instrumentlarga bagışlana.