Timur Söläymanow: «Sälät – ul texnologiya häm döres kullanılışta ul näticä kürsätäçäk»

El saen «Tatar-inform» mäglümat agentlıgında «Sälätle cäy» yal itü kampaniyasenä bagışlangan matbugat konferentsiyase uza. Bıel çarada Tatarstan Respublikası Räise yardämçese, Tatarstan Respublikasınıñ «Aldıngılar xäräkäte» balalar häm yaşlär gomumrossiya ictimagıy däülät xäräkäteneñ töbäk bülege sowetı citäkçese Timur Söläymanow, Tatarstan Respublikası yaşlär eşläre ministrı urınbasarı Denis Lulakow, «Sälät» yaşlär üzäge direktorı Aygöl Gabdraxmanowa häm «Sälät» yaşlär üzäge direktorı urınbasarı, «Sälätle cäy» üzäge citäkçese Ayaz Xanafin katnaştı.

Bıel «Sälät» 30 ellıgın bilgeläp ütä. Kazan däülät uniwersitetınıñ entuziast-ukıtuçıları initsiatiwası belän 1994 elda Arçada (Tatarstan) 65 bala katnaşında berençe ukıtu-sälamätländerü lagerennan başlangan «Sälät» xäräkäte, Tatarstan Respublikasınıñ 25 meñnän artık sälätle balasın häm yaşlären, Rossiya Federatsiyaseneñ unnan artık töbägen, şulay uk çit illärne üz proektlarına cälep itüçe sotsial-pedagogik komplekska kadär utızellık üseş yulı ütte.

«Sälät» yaşlär üzäge direktorı Aygöl Gabdraxmanowa süzlärençä, bıel 33 smena planlaştırıla. Bu – profille smenalar, töbäkara çatırlı «Bolgar – Tugan tel» alanı, XIII Xalıkara «Sälät» yaşlär uku-ukıtu forumı häm «Iske Kazan» cıenı. «Bıel bezdä ike yaña smena bar – «Sälät – Adımnar» häm «Sälät – Almagaç». Bez cäyge smenalar turında söyläşäbez, ämma «Sälät» cäy köne genä eşlämi. Bezneñ äzerlek sentyabrdä başlana häm şul uk ayda yomgak yasap tämamlana da. Bezneñ eşçänlek TR Räise, Yaşlär eşläre ministrlıgı, Mägarif häm fän ministrlıgı, Mädäniyat ministrlıgı häm Tsifrlaştıru ministrlıgı yardäme belän uñışlı alıp barıla».

Bıel Tatarstan, Başkortostan, Çuwaşiya häm Kırım bazalarında 25 profille smena ütkärü planlaştırıla. Alarda 7-18 yaşlek balalar häm yaşüsmerlär katnaşaçak. Tatarstan Respublikası yaşlär eşläre ministrı urınbasarı Denis Lulakow: «Bıel bez cäyge yalga 172 meñ balanı cälep itärgä planlaştırabız. «Sälät» komandasınıñ eldan-el köçleräk häm berdämräk buluı söenderä. Utız el däwamında forumnar häm smenalarnıñ sıyfatı sängat, eçtälek häm tärbiya däräcäsendä nık üste. Şunı da iskärtü möhim: «Sälät» berläşmäse smenada bulgan balalarnıñ iminlegenä zur ähämiyat birä».

«Sälätle cäy» kampaniyasenä äzer kadrlar da cälep iteläçäk. «Sälät» bu eşne el äylänäse alıp bara. Kadrlar äzerläü maksatınnan «Äydamannar mäktäbe», «Başcitäklär mäktäbe» häm «Ostazlar mäktäbe» ütkärelä. Bu xakta «Sälätle cäy» üzäge citäkçese Ayaz Xanafin tulırak söyläde: «El däwamında bez 500gä yakın äydaman, 100 başcitäk häm 300 ostaz äzerlibez. Här äydaman öçen tatar telen söyläm däräcäsendä belü möhim şartlarnıñ berse bulıp tora. Bıelgı yañalık – ul «Äydamannar mäktäbe»ndä katnaşuçılar öçen onlayn-däreslär buldırıluı. Yagni, biredä törle töbäklärdä yaşäüçelär dä katnaşa aldı.

Tatarstan Respublikası Räise yardämçese Timur Söläymanow «Sälät» berläşmäseneñ «Aldıngılar xäräkäte» belän üzara bäyläneşe turında söyläde: «Aldıngılar xäräkäte»ndä katnaşuçılarnıñ kübese «Sälät» proektlarında katnaşu täcribäsenä iya. Alar inde proektnıñ asılın añlıylar. «Aldıngılar xäräkäte», gomumrossiya xäräkät bularak, «Sälät» berläşmäsenä törle mömkinleklär birä. «Sälät» bilgele ber kıymmätlär nigezendä üsä. Ul texnologiya häm döres kullanılışta näticä kürsätäçäk».

15 iyunnän 21 iyungä kadär Bilär cirlegendä töbäkara çatırlı «Bolgar – Tugan tel» alanı uzaçak. Alannıñ programması tatar telen, mädäniyaten öyränügä, telneñ törle ölkälärdä gamäli kullanışın arttıruga yunältelgän.

24 iyunnän 9 awgustka kadär Bilär tarixi-arxeologik muzey-tıyulıgı territoriyasendä XIII Xalıkara «Sälät» yaşlär uku-ukıtu forumı uzaçak. Tatarstan Respublikası Räise Röstäm Miñnexanow yardäme belän uzdırıluçı yaşlär proektı Tatarstan Respublikası rayonnarınnan 14 000 sälätle balanı, ostazlarnı, Rossiyaneñ başka töbäklärennän häm çit illärdän watandaşlarnı berläşteräçäk.

Forum kısalarında törle yunäleşlär häm profillär buença altı smena ütäçäk. Belem birü, mädäni häm sport programmaları uzdırıluı planlaştırıla. Tatarstannıñ häm Rossiyaneñ aldıngı belgeçläre, muzıkantları, artistları üz täcribälären forum katnaşuçılarına citkeräçäk.

17 awgustta Tatarstannıñ Biektau rayonında Iske Kazan muzey-tıyulıgında «Iske Kazan» cıenı uzaçak. Ul goref-gadätlärne saklauga häm tugan yak tarixın öyränügä, yaş buınnıñ tatar xalkınıñ tugan telenä häm mädäniyatenä igtibarın arttıruga häm tugan cir tabigatenä, tarixına häm mädäniyatenä, duslıkka, mädäniyatara häm etnikara aralaşuga karata ixtiramın arttıruga häm mäxäbbät ruxın tärbiyaläügä yunältelgän.

Kön däwamında muzey-tıyulık territoriyasendä «Hönärlär yarminkäse» eşläyaçäk, anda balalar Tatarstan Respublikasınıñ tanılgan dizaynerları belän berlektä törle traditsion eşlänmälär yasıy, üz icatın häm äzer eşlänmälärne festiwaldä katnaşuçılarga täkdim itä alaçak.

Smenalarnıñ ütkärelü wakıtı:

HÖNÄRLÄR BILÄR FORUM (Remesla / Junior skills) 24 - 28 iyun

ICAT BILÄR FORUM (Tworçestwo / Arts) 1 iyul - 7 iyul

SÄLÄT BILÄR FORUM (Selet) 9 - 14 iyul

MEDIA BILÄR FORUM (Media) 18 - 24 iyul

MÄGLÜMATI TEXNOLOGIYaLÄR BILÄR FORUM (Informatsionnıe texnologii / Information Technologies) 27 iyul - 2 awgust

ALDINGILAR BILÄR FORUM (Perwıe / Forward) 5 - 9 awgust