«Bezgä jurnalistika tügel, ä kontent yasau kızık!»: Media Bilär Forumnıñ bıelgı uku-ukıtu programması nindi? ← kire kaytirga

Bu könnärdä Bilärdä XIII Xalıkara «Sälät» yaşlär uku-ukıtu forumınıñ Media Bilär Forum smenası bara, bu älege cäydä uzdırıla torgan smenalarnıñ bişençese. 6 kön däwamında anıñ katnaşuçıları jurnalistika häm media dönyası belän tanışıp, törle ostaxanälärdä katnaşalar, lektsiyalär tıñlıylar, üzlären yaña ölkädä sınap karıylar. Forumnıñ uku-ukıtu programması bik eçtälekle. Smena yaşlärdä media ölkäse belän kızıksınunı arttırırga niçek yardäm itä? Monıñ turında Media Bilär forumnıñ sälkeşläre häm ostazları belän söyläştek!

6 kön däwamında Media Bilär Forum barışında barlıgı 127 däres uzdı. Kreatiwlık, mediatrendlar, blog alıp baru, üzeñne kürsätü, wideolar yardämendä sotsial çeltärlärdä üsü, telefonga sıyfatlı kontent yasau, interwyu alu häm kommunikatsiya tözü – bolarnıñ barısıda smenanıñ uku-ukıtu programmasına kertelgän däreslär. Kürenep torgança, alarnıñ barısı da zamananıñ aktual temalarına bagışlangan. Barlık däreslär barışında algan belemnärne sälkeşlär gamäldä kullana aldılar.

Ostaxanälärne häm kızıklı lektsiyalärne Tatarstan häm Rossiyaneñ äydäp baruçı belgeçläre uzdırdılar. Media ölkäsendäge täcribäläre belän kreatiw agentlıklar citäkçeläre, media-prodakşnnar xezmätkärläre, stsenaristlar, blogerlar, fotograf häm wideograflar, jurnalistlar häm başka belgeçlär urtaklaştılar.

Bügenge yaşlärneñ klassik jurnalistikaga karaşı turında üz fikere belän «Şähri Kazan» gazetası jurnalistı Ilgizä Galiullina büleşte:

«Media ölkäse belän kızıksınuçı balalar küp, alar klassik jurnalistika turında belep betermäsälär dä, bloging ölkäse, foto-wideo töşerü ostalıgı alarga bik kızık. Şulay da min alarnı jurnalistikanıñ töp printsipları belän tanıştırdım. Çönki bu ölkädä belemnäre bik az. Alarga mäglümatnı kızık itep birergä tırıştım, törle alımnar belän tanıştırıp, ber-bersennän interwyu aldırdım. Media dönya belän nikadär kızıklı häm kiñkırlı ikänen añlatası kilde. Çönki näk menä şunıñ belän kızıksınuçı balalar bezne, jurnalistlarnı, alıştıruçılar, kiläçägebez bit»

Uku könnäre däwamında sälkeşlär üzläre wideolar töşerep, interwyular alıp, aktual häm kızıklı kontent yasap, üzläreneñ ostalıgın bar Bilär cirenä kürsätä aldılar. Misal öçen yaşüsmerlär buınına aktual bulgan memnarga häm kreatiw kontentka bagışlangan däreslärendä eşlägän räsemnärne kiçke çaralarda Forumnıñ barlık katnaşuçıları da kürä aldı.

Media Bilär Forumda bu ölkä belän kızıksınuçı sälkeşlärneñ sanı aeruça küp. Härkaysısı diyarlek sotsial çeltärlärdä üz akkauntlarnı alıp bara, smm belgeç bulıp eşlilär, kontent yasıylar. Şuña da alarnıñ media dönyasına bulgan mönäsäbätlären, forumda algan belemnäre turında soraştık.

«Min üzem Aldıngılar xäräkäteneñ media yunäleşendä eşläp, sotsial çeltärlärdä akkauntı alıp bara. Şuña da Sälätneñ älege forumın tüzemsezlek belän köttem. Biredäge lektsiyalär häm ostaxanälärgä min üzem tartılam, barsına da ölgerergä tırışam. Çönki barısı da şundıy kızık häm eçtälekle, aeruça miña interwyu däresläre oşadı. Şulay da mine jurnalistika tügel, ä kontent yasau kübräk kızıksındıra. Smenanıñ däresläre barışında, üzemne bu ölkädä sınap karagannan soñ tagı ber kat moña inandım», dip büleşte Baulı rayonınnan kilgän Ramilä Farraxowa.

Media Bilär Forum – Sälätneñ unikal forumnarınıñ berse, näk menä anıñ kısalarında Bilär cire trendlar, kontent, kreatiw belän tula. Monnan härkem yaña açışlarga häm yaña ürlärgä omtılu xise belän kitäçäk.

Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.