Kiçä Bilärgä «Sälät» forumına «Närsä? Kayda? Kayçan?» elitar klubı ägzası Nikita Starun kilde. Belgeç balalar belän oçraştı, intellektual uen künekmäläre belän büleşte häm Aldıngılar Bilär Forum smenası katnaşuçıları öçen turnir uzdırdı.

Nikita Starun intellektual uennarda 10 eldan artık katnaşa. Forumlılar belän oçraşuda ul uennarda, şul isäptän «Närsä? Kayda? Kayçan?»da, komanda eşen yaxşırtu häm näticälelekne arttıru öçen kullanılgan texnikalar turında da söyläde. Anıñ süzlärençä, ul kübräk uynagan saen, uennarda gına tügel, tormışnıñ törle ölkälärendä kullanıp bulgan instrumentlardan aktiwrak faydalanganın äytte.

Belgeç süzlärençä, wakıt kısaları turında da istä totu möhim. Uenda da cawapnı tabu öçen bilgele wakıt birelä. Monnan tış, tıñlıy belü häm birelgän mäsälädä närsäne çişärgä kiräklegen üzeñä gadi tel belän añlatu kiräk. Mäglüm bulgan faktlarnı añlap, cawap tabarga komaçaulıy torgannarınnan çitkä kuya belü möhim. Belgeç äytüençä, ber genä yassılık belän çiklänmiçä, kiñräk fiker yörtü dä kiräk.

«Soraunıñ formasın istä totu da zarur. Häm şul uk wakıtta «Bez ezlägän äyber şuşımı soñ ul?» dip üzeñä sorau birü dä möhim. Ägär sezgä uylarga 10 sekund birelä ikän, sez ber törle cawap kaytaraçaksız, ägär 10 minut birelsä – cawabıgız bötenläy başka bulaçak. Bu bar cirdä dä şulay. Här wakıt berämlege häm östämä resurslar bezgä üz kararıbıznı kabul itü öçen ışanıçnı arttıra. Resurslarnı optimal räweştä sarıf itkändä, optimal kararga kilü noktasın tabu möhim. Bu uenda da, tormışta da bar», – dip büleşte Nikita Starun.

«Närsä? Kayda? Kayçan?» uenınıñ burıçı – bilgele ber wakıt eçendä komanda belän döres cawapnı tabu. Bez törle äyberlär öçen şuşındıy optimal cawaplar tabarga telibez. Misal öçen, komanda yaki uku proektın yasaganda, yaki xezmättäşlär belän eş mäsäläsen xäl itkändä», – dip bilgeläde ul.

Ber-bereñne işetä häm tıñlıy belü – komandada eşläü öçen ähämiyatle künekmä. Keşe belän küzgä-küz karap añlaşa, aralaşa häm fikerläreñne tuplıy belü möhim.

Monnan tış, uenda berär närsä añlaşılmasa, «Ni öçen?», «Nigä?»  sorauların birergä kurıkmaska kiräk. Ikençe keşeneñ añlatuı, anıñ fiker söreşe başkalarga faydalı bula häm kötelmägän açışlarga kiterä ala.

Şuña östäp, komandadagı här katnaşuçınıñ köçle yakların faydalana belü kiräk. «Şuşı sıyfatlarnı kullanıp, här keşegä üzenä turı kilgän mäsäläne yökläü möhim», – dide kunak.

Belgeç baş mie rezerwı turında da söyläde. Bu – komandada berençe häm ikençe temptagı uençılar bulu. Berençe temp uençıları sorau tämamlanuga uk cawapların yaudıra başlıy, ikençe temp uençıları öçen beraz uylau, «tizlekne cıyar öçen» wakıt taläp itelä.

Nikita Starun katnaşuçılar belän oçraşu barışında respublika turındagı xis-kiçereşläre belän dä büleşte. Anıñ Tatarstanga berençe kilüe, häm ul Kazannı Parij belän çagıştırdı. Aña «Çerek kül» parkı yanındagı frantsuz stilendäge öylär Ewropa şähäre turında iskä töşerep tora ikän. Bilärdä – forumda kunak tatar süzlären dä öyränä başlagan.

«Minem belän ber komandada uynauçı Timur Kafiatullin bezne tatar telenä öyrätä başladı, superblits buença trenirowkanı, tatar süzlären kullanıp, oeştıra», – dide «Närsä? Kayda? Kayçan?» uenınıñ elitar klubı ägzası.
Oçraşu tämamlanganda, belgeç intellektual uennarda katnaşu öçen iñ ähämiyatle kiñäş belän urtaklaştı.

«Bez bu cirgä läzzät alır öçen kilgän. Şuña da protsesstan täm tabu möhim. Minemçä, härkem üze öçen zur kıymmätkä iya bulgan häm üze telägän eşen başkarırga tieş», – dide ul.

Kiç belän uençı smena katnaşuçılarına intellektual turnir uzdırdı. Biredä ukuçılar algan belemnären praktikada sınadı.

Isegezgä töşeräbez, Xalıkara «Sälät» yaşlär uku-ukıtu forumınıñ yomgaklau smenası «Aldıngılar xäräkäte» Rossiya balalar häm yaşlär xäräkäte belän berlektä uzdırıla. Smena 12 nçe awgustta tämamlanaçak.