«Cälät» häm «Aldıngılar xäräkäte» üzara dustanä mönäsäbät buldıra ← kire kaytirga
Bilärdä forumnıñ altınçı smenası – «Aldıngılar Bilär Forum» däwamında Tatarstan Respublikası Räise yardämçese, «Aldıngılar xäräkäte» balalar häm yaşlär gomumrossiya ictimagıy-däülät xäräkäteneñ töbäk bülege Sowetı citäkçese Timur Söläymanow belän oçraşu uzdı. Ul xäräkät eşçänlege häm plannarı turında söyläde, katnaşuçılarnıñ soraularına cawap birde.
«Bez balalar xäräkäte tözibez, ä anda yaşüsmerlär belän bergä olılar da rol uynıy. Läkin ägär olılar üzläre niçek möhim dip sanıy, şulay eşläsä, ä sez tamaşaçılar sıyfatında gına bulsagız, berni dä barıp çıkmayaçak, – dip möräcägat itte yaşüsmerlärgä Timur Söläymanow. – Älege xäräkät eşçänlek häm mägnä yagınnan da nigezle, çın bulırga tieş. Bez ber ay yaki ber eldan soñ anıñ nindi bulaçagın belmibez. Bıelgı cäydä Tatarstanda gına da 30 meñ bala «Aldıngılar xäräkäte» çaralarında katnaştı. Xäräkät bik masştablı häm böten il buença — Rossiyaneñ 89 töbägendä formalaşa».
Tatarstan komandası «Aldıngılar xäräkäte»n sakçıl karaş belän buldırırga teli. Bu respublika balalar häm yaşlär xäräkätläreneñ üseşe öçen kiräk. Misal öçen, «Aldıngılar Bilär Forum» uza torgan Bilärdä «Cälät» xäräkäte katnaşuçıları «Aldıngılar xäräkäte» belän tanışa. Şulay itep, «Cälät» häm Rossiya balalar häm yaşlär xäräkäte üzara dustanä mönäsäbät buldıra. «Aldıngılar xäräkäte» barlıkka kilü «Cälät»ne tagın da köçleräk itsen», – di Timur Söläymanow.
Oçraşu katnaşuçıları «Aldıngılar xäräkäte» simwolları belän dä tanıştı: bu — maxsus bilge, beläzek häm xäräkätkä bagışlau wakıtında äytelä torgan süzlär.
Respublikadagı «Aldıngılar xäräkäte» liderı xäräkät isemeneñ tatarça tärcemäsenä dä tuktaldı:
«Bez xäräkätneñ isemen «berençelär» dip tügel, ä «aldıngılar» dip tärcemä ittek, çönki anıñ asılına näk şuşı mägnä salıngan. Berençe urın küp bula almıy, tik härkem aldıngı bula ala. Şuña da bez – «Aldıngılar xäräkäte», bez – aldıngılar, bez – berençe».
«Aldıngılar xäräkäte» – fikerdäşlär xäräkäte. Üz çıgışında Timur Söläymanow monıñ turında berniçä tapkır assızıkladı.
«Min xäräkätkä här telägän keşe kuşıla aluın häm «Aldıngılar xäräkäte»neñ köçäyuen telim. Katnaşuçılar biredä üzlären uñaylı xis itä alsın öçen, anı sakçıllık belän genä buldırırga, üsterergä kiräk. «Aldıngılar xäräkäte» härkem öçen açık bulırga tieş», – dip tämamladı oçraşunı citäkçe.