«BikaFest» talantlar ezli! ← kire kaytirga

Sälätneñ iñ icadi festiwale yanä sälätlelärne barlıy! Bügennän XXIII Respublikaküläm R. Bikmullin isemendäge yaşlär cır-şigriyat «BikaFest» festiwalenä garizalar kabul itügä start birelä.

Balalarda häm yaşlärdä estetik zäwık, muzıkal kultura tärbiyaläüçe häm, iñ möhime, alarnıñ dustı, fikerdäşe, yaşlär liderı, metsenat awtor-başkaruçı Röstäm Bikmullinnıñ istälegen mäñgeläşterüçe festiwal ike etapta ütkärelä:

1 etap – garizalarnı kabul itü häm katnaşuçılarnı çittän torıp portfoliolar nigezendä saylap alu (soñgı 2 el kazanışları kabul itelä); 

2 etap – katnaşuçılarnı konkurs nigezendä saylap alu. 

Berençe etap näticäsendä katnaşuçılar ikençe etapka – konkurska çakırıla. Ul «Yoldızlı» bazasında uzaçak. Konkurs näticäsendä festiwalneñ Gala-kontsertı bulaçak, anda «BikaFest» ciñüçelärenä tantanalı räweştä büläklär tapşırılaçak.

«BikaFest» festiwale ike yunäleştä ütkärelä: 

1. Muzıkal yunäleş: 

- iñ osta awtor başkaruçı;

- awtor cırın iñ osta başkaruçı kollektiw;

- iñ osta kollektiw-başkaruçı;

- tatar xalık cırın iñ osta başkaruçı;

- tatar kompozitorlarınıñ akademik äsären iñ osta başkaruçı;

- estrada cırın iñ osta başkaruçı;

2. Ädäbi yunäleş: 

- üz äsären iñ osta ukuçı;

- başka awtor äsären iñ osta ukuçı.

2001 eldan başlap uzdırıluçı festiwal bıel da şäp yañalıklar äzerläde. Katnaşuçılar üz köçlären yaña nominatsiyalärdä sınap karıy alaçak. Yaña talantlarga kanatların cäyargä mömkinlek birüçe Röstäm Bikmullin isemendäge Respublikaküläm «BikaFest» yaşlär cır-şigır festiwale xakında tulırak mäglümat proektnıñ nigezlämäsendä.