Сегодня в Казани определятся победители IX Республиканской премии «Самрух»
19.02.2024
Bügen Kazanda IX Respublikaküläm «Sämrux» el premiyase ciñüçeläre bilgele bulaçak. Ciñüçelärne büläkläü tantanası «Piramida» küñel açu kompleksında 18:00 sägattä uzaçak. Anda el däwamında «Sälät» xäräkätendä aktiw katnaşuçı talantlı balalar häm yaşlär büläklänäçäk. Bu xakta «Tatar-inform» mäglümat agentlıgında IX Respublikaküläm «Sämrux» el premiyasen tapşıru tantanasına bagışlangan matbugat konferentsiyasendä xäbär ittelär.
«Sälät» yaşlär üzäge direktorı Aygöl Gabdraxmanowa äytüençä, bıel tugızınçı märtäbä uzdırıluçı «Sämrux» el premiyase 9 töp nominatsiya kısalarında ciñüçelärne saylayaçak.
«El däwamında «Sälät»ne üstergän, «Sälät» xäräkätendä aktiw katnaşkan talantlı balalar häm yaşlärgä räxmät yözennän «Sämrux» sının tapşıru – ul bezneñ el saen oeştırıla torgan kürkäm traditsiya. Bıel «Sämrux» el premiyase tugızınçı tapkır uzdırıla. Bügen «Piramida» küñel açu kompleksında 9 isem bilgele bulaçak – 2024 elnıñ «Sämrux» premiyase iyaläre. Büläkläü tantanası onlayn-translyatsiyadä dä kürsäteläçäk. Bıel bezneñ töp 9 nominatsiyadän tış östämä 9 nominatsiya dä äzerlände. Töp nominatsiyalär kısalarında «El äydamanı», «El ölkän äydamanı», «El direktorı», «El sälkeşe», «El komandası», «El kuldaşları», «El alanı», «El klubı» häm başka isemnär iyaläre bilgele bulaçak. Östämä nominatsiyalär älegä ser bulıp torsın», – dide ul.
«Sämrux» sını belän berrättän ciñüçelärgä akçalata premiya karalgan. Anı sälkeşlär, «Sälät» dönyasına bitaraf bulmagan keşelär üzläre cıya. «Sämrux» premiyase el saen şundıy sistema buença eşli. «Uzgan el, mäsälän, 700 meñgä yakın akça cıelgan ide. Ul akçalar ciñüçelärgä bülep tapşırıldı. Bıel isä – 600 meñ sum akça cıeldı. Älege summanı şul uk sistema buença tugız nominatsiyagä tigez itep büläçäkbez», – dip añlattı Aygöl Gabdraxmanowa.
«Traditsion «Sämrux» el premiyase «Sälät»lelärne tanıtu häm berläşterü forsatınnan ütkärelä torgan matur ber çara bularak, iñ aktiw, iñ sälätle balalar häm yaşlärne bilgeläp ütäçäk. «Sämrux», gadättägeçä, böten «Sälät» gailäsen bergä cıyaçak, dip kötelä», – dide Aygöl Gabdraxmanowa.