Sälät balalarnıñ telgä mönäsäbäten üzgärtä kire kaytirga

Sälät balalarnıñ telgä mönäsäbäten üzgärtä
«Tatar-inform» mäglümat agentlıgında «Sälätle cäy» yal itü kampaniyasenä bagışlangan matbugat konferentsiyase uzdı. Çarada Tatarstan Respublikası yaşlär eşläre ministrı urınbasarı Aygöl Sabirowa, «Sälät» yaşlär üzäge direktorı Aygöl Gabdraxmanowa, «Sälät» mägarif häm uku-ukıtu texnologiyaläre üzäge citäkçese urınbasarı Aygöl Wäliullina häm VIII «Sämrux» El premiyaseneñ «El sälkeşe» nominatsiyase ciñüçese Almaz Nigmätcanow katnaştı.

«Sälätle Cäy» yal itü kampaniyase kısalarında, gadättägeçä, profille smenalar, töbäkara çatırlı «Bolgar –Tugan tel» alanı, XII Xalıkara «Sälät» yaşlär uku-ukıtu forumı häm «Iske Kazan» cıenı uzaçak.

«Sälät üz zamanında ber alannan häm 65 baladan başlandı, ä bıelgı cäydä bez inde anıñ 30 nçı sezonın başlıybız. Şuşı wakıt eçendä Sälät Rossiyaneñ häm Tatarstannıñ küp töbäklärendä däwam itä torgan çın traditsiyagä äylände», - dip söyläde Aygöl Sabirowa.

Şulay uk ministr urınbasarı Räis Röstäm Miñnexanownıñ Sälät üseşenä zur öleş kertüen dä bilgeläp ütte. «Röstäm Miñnexanow yardäme belän uzgan elda 100 dän artık proekt gamälgä aşırıldı, şul isäptän Kırımda «Sälät - Ak Bars» yaşlär üzäge, Sälät «Asıltaş» mäktäbe häm «Adımnar — belemgä häm tatulıkka yul» polilingwal belem birü komplekslarında «Sälät» sıynıfları barlıkka kilde, - dip bilgeläde ul üz çıgışında.

Aygöl Gabdraxmanowa süzlärençä, Sälät küp däräcäle mädäni moxit tudıra, anda balalar tatar tele belän tanışa ala.

«Sälät - balalar öçen tatar telen öyränü öçen menä digän mömkinlek, dip sanıybız. Cäyge alannarga bez anı belmägän yaşlärne dä alabız. Iñ möhime - öyränü teläkläre bulsın. Sälät - balalar lagere gına tügel. Ul äle uçak yanındagı kiçke söyläşülär, mädäni çaralar, muzıka - bolar barısı da balalarnıñ telgä mönäsäbäten üzgärtä, öylärenä alar yaña belemnär belän kayta».

Şulay uk «Sälät» yaşlär üzäge direktorı bu elnıñ yañalıkları belän dä urtaklaştı. «Yaña sezonda bez gamäldäge alannarnıñ sıyfatın arttıruga basım yasadık häm alarnıñ programmaların yañarttık, läkin yañalıklar da barlıkka kilde: Çuwaşiyadä «Sälät-Batır» üzäge açıldı, bıel anda yaña 4 alan ütüe planlaştırıla, şulay uk «Argamak» bazasında da yaña «Sälät-Miras» smenası uzaçak, ä töbäkara «Bolgar-Tugan tel» alanınıñ ikençe häm Bilär Forumnıñ altınçı smenaları bıel Rossiyaneñ «Aldıngılar xäräkäte» balalar häm yaşlär xäräkäte belän berlektä uzaçak.

«Bezneñ yullamalarga bäyalär respublika buença urtaça. Alar öleşçä däülät tarafınnan subsidiyalänä, öleşçä ata-analar tarafınnan tülänä. Yullamaga yaşäü, tuklanu häm balalarga birelä torgan produktsiya kerä. Däülät tarafınnan tulısınça tülänelä torgan yullamalar bar - mäsälän, «Bolgar-Tugan tel» alanı häm Bilär Forum. Bıel keşbek karalmagan, ämma yullamaga çıgımnarnıñ ber öleşen kire kaytarırga mömkin bulaçak», - dip söyläde Aygöl Gabdraxmanowa.

«Sälättäge uku-ukıtu programması – ul däreslär häm ostaxanälär genä tügel, ul, ä gomumän, Sälät moxite. Kommunikatsiyalär, aralaşu, muzıka – bolar barısı da programmanıñ ber öleşe», - dip assızıkladı «Sälät» mägarif häm uku-ukıtu texnologiyaläre üzäge citäkçese urınbasarı Aygöl Wäliullina.
Anıñ süzlärençä, üzäkneñ töp burıçı - sıyfatlı programma äzerläü, älege äzerlek közdän ük başlana. Här smenanıñ üz profile bar, balalar üzlärenä oşaganın saylıy ala. Uku-ukıtu programması alannıñ profile nigezendä äzerlänä.

«Sälätle Cäy» yal itü kampaniyasenä äzerlekle kadrlar cälep iteläçäk. Sälät bu eşne el äylänäse alıp bara. Kadrlar äzerläü maksatında «Äydamannar mäktäbe», «Başcitäklär mäktäbe» häm «Ukıtuçılar mäktäbe» uzdırıla. Alarnıñ eşçänlegendä 700dän artık keşe katnaşa.

«Minem Sälättäge yulım 2021 elda başlandı, ul wakıtta mäktäptäge ukıtuçım miña Bilär Forumga barırga täkdim itte. Forumnan soñ min «Fensar» bazasında uzuçı alanda yal ittem. Sälät minem küñelemä kerde, min anıñ belän aerılışırga telämädem. Şunnan soñ min üzemä biregä el saen äylänep kaytırga wägdä ittem. Şuşı ike el eçendä minem Sälättäge aktiw eşçänlegemneñ näticäse «Sämrux» El premiyasendä ciñü buldı, - dip söyläde jurnalistlarga Almaz Nigmätcanow.

Yal itü kampaniyase kısalarında bıel Tatarstan, Başkortostan, Çuwaşiya häm Kırım bazalarında 30 profille smena uzuı planlaştırılgan. Alannarda, 7 yaştän alıp, 18 yaşkä kadärge balalar häm yaşüsmerlär katnaşaçak.

Kırımdagı «Sälät – Ak Bars» yaşlär üzägendä (Foros bistäsendä urnaşkan) 4 cäyge smena ütkäreläçäk. Alar 10 iyunnän 16 awgustka kadär uzaçak. Diñgez buenda uzuçı profille smenalar Tatarstan Respublikasınnan, Rossiyaneñ başka töbäklärennän 220şär katnaşuçını häm çit illärdän kilgän watandaşlarnı berläşteräçäk.

Aygöl Gabdraxmanowa süzlärençä, Kırımda yalga ixtıyac arta. «Bıel «Sälät - Ak Bars» bazasında uzuçı alannarga bik küp garizalar kilde. Anda barlık kurkınıçsızlık kagıydäläre ütälgän, ä saklau täülegenä 24 sägat başkarıla. Şulay uk üzäk territoriyasendä daimi räweştä meditsina personalı häm äydamannar kizü tora».

12 iyunnän 26 iyungä kadär Bolgar şähärendä töbäkara çatırlı «Bolgar –Tugan tel» alanı uzaçak. Alannıñ programması tatar telen, mädäniyaten öyränügä, telneñ törle ölkälärdä gamäli kullanışın arttıruga yunältelgän.
23 iyunnän 11 awgustka kadär Bilär tarixi-arxeologik muzey-tıyulıgı territoriyasendä XII Xalıkara «Sälät» yaşlär uku-ukıtu forumı uzaçak.

Tatarstan Respublikası Räise Röstäm Miñnexanow yardäme belän uzdırıluçı yaşlär proektı Tatarstan Respublikası rayonnarınnan 14 000 sälätle balanı, ostazlarnı, Rossiyaneñ başka töbäklärennän häm çit illärdän watandaşlarnı berläşteräçäk.

Forum kısalarında törle yunäleşlär häm profillär buença altı smena ütäçäk. Belem birü, mädäni häm sport programmaları uzdırılu planlaştırıla. Tatarstannıñ häm Rossiyaneñ aldıngı belgeçläre, muzıkantları, artistları üz täcribälären forum katnaşuçılarına citkeräçäk.

Smenalarnıñ ütkärelü wakıtı:
HÖNÄRLÄR BILÄR FORUM (Remesla / Junior skills) 23 - 27 iyun
ICAT BILÄR FORUM (Tworçestwo / Arts) 30 iyun - 5 iyul
KARERA TEXNOLOGIYaLÄRE BILÄR FORUM (Karernıe texnologii / Career Technology) 10 - 15 iyul
MEDIA BILÄR FORUM (Media) 19 - 25 iyul
MÄGLÜMATI TEXNOLOGIYaLÄR BILÄR FORUM (Informatsionnıe texnologii / Information Technologies) 28 iyul - 3 awgust
ALDINGILAR BILÄR FORUM (Perwıe / Forward) 7 - 11 awgust