Kamilä Gıybadullina: «Alanıma, Sälätemä, tatar telemä mäxäbbät mine alga barırga öndäde!» ← kire kaytirga

19 fewral könne Bäşir Rämiew isemendäge IT-parkta här sälätle dulkınlanıp kötä, äzerlänä torgan grandioz çara – X «Sämrux» el premiyasen tapşıru tantanası uzdı. Säxnädän üz isemen işetüçe finalistnıñ xis-kiçereşläre, ciñüneñ uñış formulası xakında X «Sämrux» el premiyaseneñ «El sälkeşe» nominatsiyase ciñüçese, Saba» alanı sälkeşe Kamilä Gıybadullina belän söyläştek.

— Sälät dönyasına yaña gına kuşılgannarga Sälätneñ närsä ikänen niçek añlatır ideñ?

Sälät — ul küpkırlı şäxeslärdän torgan tasmalarnıñ totaşkan ber noktası. Biredä sin üzeñneñ şäxsi uñışlarıñnı arttırıp, säläteñne bötenläy başka yaktan açıp cibärä alasın. Sälättä härkem ber-berenä dus, teräk, ışanıç.

— Sin üzeñ Sälät dönyasına kayçan kuşıldıñ? Ul mizgellärne xäterliseñme?

Sälätkä min 5 el elek, 2020 nçe elda, täüge adımımnı yasadım. «Sälät-Saba» alanında ütkärgän 18 könemne äle dä xäterlim: här kiçke çara, Bilärdäge sörännär, alan prezentatsiyaläre, xätta tönlä yangan besedka utları – barısı da mine soklandıra, gacäpländerä ide.

— «Sämrux» el premiyase sindä nindi täesirlär kaldırdı?

Döresen genä äytkändä, äle dä ışanıp betä almıym. Meñnärçä sälkeşlär arasında «El sälkeşe» bulu — bu başka sıymaslık fiker. Bik söendem, älbättä, 4 tapkır katnaşıp, xıyalıma äwerelgän Sämrux koşı ide bit ul. Duslarım da härçakta yanäşädä bulu miña nık bulıştı, bu mizgelne tagın da läzzätleräk itte.

— «El sälkeşe»ndä sezneñ alannan barlıgı 6 sälkeş katnaştı, üzeñnekelär belän yarışu awır bulmadımı?

Älbättä, duslar belän yarışu bik kıen. Tik bezneñ oçrakta bergä buluıbız bezne nıgıttı gına: ber-berebezneñ çıgışlarında katnaştık, yardäm ittek, nık tayanıç bulırga tırıştık. Üzebez küp bulgaç, canatarlar da baytak ide, tanış yözlär siña elmaep, küzläre yanıp karap torganda, diwarlar da bulışa başlıy, dilär.

— Konkursta iñ istä kalgan mizgel sineñ öçen närsä buldı?

Final etabında barlık alanıbız belän bergä koçaklaşıp, büläklär bireşü, teläklär, matur süzlär äyteşü mizgelläre haman küñelemne cılıtıp tora. Iñ istä kalgan mizgel näk şuldır.

— Sineñçä, ciñü kiterergä yardäm itkän töp faktorlar sineñ öçen närsä buldı?

Yakınnarımnıñ, bigräk tä berniçä aerım keşeneñ miña üzemnän dä köçleräk ışanuı, xıyalnı çınga aşıru teläge, alanıma, Sälätemä, tatar telemä mäxäbbät mine alga barırga öndäde, ışanıç häm köç östäp tordı.

— El sälkeşe nindi bulırga tieş – sinnän kiñäşlär?

Üz telen, keçe tugan ciren yaratırga; dönyanı yaxşı yakka üzgärtergä telärgä; karşılıklardan kurıkmaska, uñışsızlıklar kilep çıkkan oçrakta kabattan tırışıp kararga; Sälätne üsterü östendä eşlärgä. Şul oçrakta gına, zur uñışlarga ireşep bula, minemçä.