Летний сезон «Сәләт» 2025 года: как попасть в лагеря Черноморского побережья
25.04.2025
«Tatar-inform»da uzgan matbugat oçraşuında 2025 elda «Sälätle cäy» yal itü kampaniyase häm Xalıkara «Sälät» yaşlär ukıtu forumı turında söylädelär.
2025 elgı cäyge sezonda «Sälät» lagerları 4 meñgä yakın balanı kabul itäçäk. Yal itü üzäkläre Tatarstan, Başkortstan, Çuwaşiya häm Kırım respublikalarında urnaşaçak. «Sälät» yaşlär üzäge direktorı Aygöl Gabdraxmanowa beldergänçä, smenalar Tatarstan, Rossiya töbäklärennän häm çit illärdän kilgän balalarnı berläşteräçäk.
«Yaşlärneñ igtibarın tatar telen öyränügä cälep itäsebez kilä»
«Sälätle cäy – 2025» yal itü kampaniyase mart aennan başlap üz eşçänlegen aktiw räweştä başlap jibärde. Bıel 26 maydan başlap 31 awgustka kadär eşläyaçäk 24 «Sälät» alanında 3500dän artık bala yal itüe kötelä. Alannarda, gadättägeçä, portfolio nigezendä saylap alıngan törle yaş kategoriyalärendäge, küp ölkälärdä ireşkän uñışları bulgan, Tatarstan rayonnarı, mäktäpläre, Rossiya töbäkläre ukuçıları, aktiwistları, «Sälät» berläşmäseneñ rayon mäktäp klubları liderları katnaşa alaçak. Alannarda, 7 yaştän alıp 18 yaşkä kadärge balalar häm yaşüsmerlär katnaşaçak», – dide «Sälät» yaşlär üzäge direktorı.
Här balanıñ üzenä oşagan profille alannı saylau häm şuşı yunäleşne tiränten öyränü mömkinlege bar. Cäyge alannarnıñ isemlege belän «Sälät»neñ räsmi saytında tanışırga mömkin.
Garizalar şuşı saytta kabul itelä. Gariza cibärü tärtibe bik gadi: saytka kerep, bala turında barlık kiräkle mäglümatlarnı häm anıñ barlık bulgan uñışların tutırırga häm barırga telägän alanına gariza cibärergä kiräk.
14 iyunnän 20 iyungä kadär töbäkara çatırlı «Bolgar –Tugan tel» alanı uzaçak. Alan eşçänlege «Tatarstan Respublikası däülät telläre häm Tatarstan Respublikasındagı başka tellärne saklau, öyränü häm üsterü buença Tatarstan Respublikası däülät programması»n gamälgä aşıru kısalarında oeştırıla.
«Proektnıñ maksatı – yaşlärneñ igtibarın tatar telen öyränügä cälep itü. Älege maksatka ireşü öçen yaña mäglümati häm metodik eşlänmälär kullanıla, tatar mädäniyate traditsiyaläre üzläşterelä, aktiw pozitsiyale sälätle şäxes tärbiyaläüdä innowatsiyale alımnar kullanıla», – dip añlattı «Sälätle cäy» üzäge citäkçese Ayaz Xanafin.
Altı meñ bala Kara diñgez buena bara: «Kurkınıçsızlık taläpläre bezneñ öçen bik möhim»
2025 elda Tatarstannan 6 meñnän artık bala Kara diñgez yarı bue lagerlarına yal itärgä baraçak.
«Cäy däwamında Tatarstannan Kırım respublikasında barlıgı 3 meñ yarım bala, Krasnodar ölkäsendä şulay uk 3 meñgä yakın bala yal itäçäk. Kırım respublikasında urnaşkan «Sälät – Ak Bars» bazasında «Maxsus «Sälät – Arşan» smenasına 220 bala kabul iteläçäk», – dide yaşlär üzäge direktorı Aygöl Gabdraxmanowa.
«Sälät – Ak Bars» lagerendä Rospotrebnadzor tarafınnan diñgezdä koenu röxsäte alıngan.
«Kırımda «Sälät»neñ ber smenası uzaçak, «Sälät – Arşan» – awgust aenda oeştırıla. Kurkınıçsızlık taläpläre öçen «Sälät – Ak Bars» baza citäkçeläre cawaplı. Rospotrebnadzor tarafınnan diñgezdä koenu röxsäte alındı, şuña kürä bez balalarnı cibärä alabız, röxsät bar. Balalarnı oeştırılgan törkemnärdä poezd belän alıp baraçakbız, anda da barlık personal ukıtılgan, karalgan, kurkınıçsızlık taläpläre bezneñ öçen bik möhim», – dip añlattı «Sälät» yaşlär üzäge direktorı Aygöl Gabdraxmanowa.
- Kara diñgez yarı buenda öç lager – «Wityazewo» (Anapa), «Globus» (Anapa), «Satera» (Kırım) lagerlärendä balalar yalın TR Yaşlär eşläre ministrlıgı yardäme belän «Çernomorets» respublika üzäge, ä «Sälät – Ak Bars»ta (Kırım) yalnı «Sälät – Ak Bars» yaşlär üzäge oeştıra.
Bäyalär teşlime: «Cäyge yalnıñ minimal küläme 7 meñnän başlana, tüläüsez dä yal itep bula»
«Sälät» yaşlär üzäge direktorı Aygöl Gabdraxmanowa 2025 elda «Sälät» lagerlarında yal itü öçen yakınça bäyalärne atadı. Äti-änilär öçen cäyge yalnıñ minimal küläme 7 meñnän başlana, şul uk wakıtta tüläüsez yal itü mömkinlege dä bar.
«Bolgar Tugan tel» häm başka çatırlı alannar däülät tarafınnan finanslana, alar buşlay. Berniçä smena rayonnarda uza, munitsipal berämleklär belän bergä çıgımnarnı istä totıp häm respublikadan bülenep birelgän finanslarga tayanıp andagı smenalar 7-8 meñnän başlanıp kitä. Iñ kıybatlı smena 40 meñgä yakın, ul 18 könlek tulı profille smena», – dip añlattı ul.
Ul «Sälät» lagerlarına yullama alu öçen ütkärelä torgan konkurs sannarı belän dä tanıştırdı.
«Küp ellar eşläüçe alannarga ber urınga 7-8 bala, läkin här elnı bez yaña alannar açıp torabız, alarnıñ isemnäre bik bilgele tügel, anda ber urınga 2-3 bala bula», – dide Aygöl Gabdraxmanowa.