27.08.2022
Tatarstan Prezidentı Röstäm Miñnexanow «Sälät» xalıkara uku-ukıtu forumı katnaşuçıları belän oçraştı. Gadättägeçä, respublika citäkçese alannar eşçänlege belän tanışıp, sälkeşlärneñ xälen beleşte.
Xäzerge köndä «Sälät»neñ bişençe smenası bara. Barlıgı altı smena oeştırılaçak. 27–31 iyuldä uza torgan smena mäglümati texnologiyalärgä bagışlangan. Biredä 1077 bala yal itä. Gomumän, altı smena kısasında Bilär cire 6300 sälkeşne kabul itär dip kötelä.
Röstäm Miñnexanow cirle wideostudiyadä uzgan äñgämä wakıtında respublikada tatar telen, milli goref-gadätne häm mädäniyatne saklau häm üsterügä zur igtibar birelüe turında söyläde.
– Biredä zur üzgäreşlär bulgan. Soñgı berniçä el eçendä «Sälät» bik nık üste. – dide ul sälkeşlär belän oçraşkaç. – Bıel «Adımnar» kompleksında «Sälät» klassları buldırıldı, «Sälät» bazasın Kırımda açtık. Bıel Bilärdä 6 smena ütä. Rossiyaneñ törle töbäklärennän, Tatarstannıñ barlık rayonnarınnan meñlägän balalar, yaşlär bergä cıela. Sezneñ öçen kiñ mömkinleklär açıla. «Sälät» tugan telne häm mädäniyatne saklau häm üsterü eşendä dä aldıngı saflarda tora. Bu şulay buldı häm bulaçak ta. Şuşı cawaplılıknı gel istä totarsız dip ışanam. Bez sezgä zur ömetlär belän karıybız, – dide Prezident.
Tatarstannıñ yaşlär eşläre ministrı Timur Söläymanow äytüençä, «Sälät» – Rossiya häm Tatarstannıñ törle töbäklärennän cıelgan meñlägän bala öçen mömkinleklär moxite. «Forum eldan-el kamilläşä. Palatkalı lagerdan ul inde tulı kanlı belem birü sistemasına äwerelde. «Sälät» tatar telen saklau häm üsterü öçen dä zur öleş kertä», – dide ministr.
«Sälät» yaşlär üzäge direktorı Aygöl Gabdraxmanowa forumnıñ eşçänlege belän tanıştırdı. «Forum bularak 2012 eldan birle eşlibez. 26 el däwamında bez Bilär cirenä kaytabız. Kiläse elga «Sälät»neñ 30 ellıgın bilgeläp ütäbez», – dide ul.
Tulırak: https://vatantat.ru/2022/07/88255/
