«Cәләт» зажигает или, кто стал победителем премии «Сәмрух»?

Yaratıp kına ber-bersenä apa-abıy dip endäşülären işetkäç, säxnädä basıp toruçı katnaşuçılarnıñ niçek dulkınlanuların kürgäç, şuşı küñelle mizgellärne alar belän bergä kiçerü teläge tagın da arttı.

«Sämrux» premiyase 2015 eldan alıp uzdırıla. Anıñ maksatı – «Sälät» xäräkätendä katnaşuçı talantlı balalarnı häm yaşlärne büläkläü, «Sälät» aktiwistlarınıñ, partnyorlarınıñ, proektlar awtorlarınıñ häm oeştıruçılarnıñ eşenä bäya birü. Katnaşuçılarnı 13 nominatsiyadä büläklädelär. Bıel berençe tapkır ör-yaña «El initsiatiwası» digän nominatsiyagä dä sulış ördelär. Anda töbäk «Sälät» klubları häm Sälät aktiwı mäktäbe proektları katnaşkan.

Kiçäne açık dip belderep, iñ zur räxmät süzlären «Sälät» yaşlär üzäge direktorı Aygöl Gabdraxmanowa belderde: «Bügen nindi genä xislär kiçermibez. Ciñüçelärdän dä nıgrak üzebez, alarnıñ äti-äniläre, ostazları dulkınlana. 2020 nçe el «Sälät» öçen bik bay häm uñışlı el buldı. Ägär dä mondıy köçle komandabız bulmasa, bu näticälärgä ireşmägän dä bulır idek. Räxmät hämmägezgä!»

Premiyagä laeklılar gına saylanıp alına dip kurıkmıyça äytergä bula. Çönki katnaşuçılar 4 etap ütep, jyuri ägzaläreneñ tänkıyt küzlege aşa uza. Başta garizalar kabul itälär, soñınnan portfolio nigezendä kiläse etapka uzuçılarnı bilgelilär. Bıel 90nan artık katnaşırga teläk belderüçe bulsa da, alarnıñ 70en genä saylıylar. Iñ zur äzerlekne, mögaen, 3 nçe etap taläp itäder. Biredä katnaşuçılar üzläre belän tanıştırırga, cyurinıñ kötelmägändä genä birep kuygan soraularına cawap tabarga, kayber nominatsiyalärdä xätta pedagogik oçraklarnı xäl itü kebek biremnär dä ütärgä tieşlär. Läkin «sälätlelär» bireşä torgannardan tügel. Alardagı köç häm energiya küplärne tañ kaldırırlık, küzlärendä oçkınnar uynıy, üzlärennän cılılık börkelä.

Yomgaklau etabın uzdıru öçen dä az köç taläp itelgän dimäs idem. «Piramida» küñel açu üzägen sägatlär däwamında gör kitergän alıp baruçılar Gölnaz Säfärowa häm Tahir Nasıybullin da, miña kalsa, aerım maktaularga laek. Härkem küñelenä açkıç taba belep, çara däwamında yaşlär belän ber dulkında buldı alar. Şulay uk kiçäne sälkeşlär, äydamannar, tanılgan cırçı-kompozitorlar: Ilnaz Säfiullin, Ilgiz Şäyxraziew, Zärinä Wildanowa, Elmir Nizamow üz çıgışları belän bizädelär. Çaranı retro stildä oeştırgannar, muzıka, cırlar – barısı da küñelgä ütep kerep, xatirälär diñgezenä çumarga mömkinlek birde. Premiyane tapşıru tarixında berençe märtäbä tatarça stendap formatındagı çıgış ta zur yañalık ide. Sälätkä genä kagılışlı kızıklı wakıygalarnı yumor küzlege aşa kiçerep, tamaşaçını räxätlänep kölderdelär. Sälät gimnında «Can cepläre bäyli sälkeşlärne» digän bik urınlı süzlär bar. Älege kiçädä bulgan härkem moña inangandır, mögaen. Alar arasında köndäşlek yuk, kem genä ciñsä dä berdäm bulıp kala belälär. Säxnädä ciñüçe isemen işetergä teläp, soñgı mizgelgä kadär kulga-kul totınışıp toruları – monıñ açık dälile.

Premiya iyalären diplom, akçalata häm istälekle büläklär, ä iñ möhime, «Sämrux» sını belän söenderdelär. Süz uñaennan, bıel konkursınıñ premial fondı 500 meñne täşkil itkän.

«Sälät – mömkinleklär möhite, akıl, rux, tel berlege!» Çınnan da, älege xäräkättä katnaşuçı härkem ciñüçe isemenä laeklı, çönki alar şuşı cılı möhittä tärbiyalänep, Respublikabız yaşäeenä zur öleş kertep, alga atlıylar. Mondıy yaşlär bulganda – kiläçägebez nıklı kullarda dip ikelänmiçä äytergä bula.

Menä ul iñ-iñnär isemlege:
El sälkeşe: Wildanow Nariman
El äydamanı: Xäsänowa Zölfiya
El ölkän äydamanı: Xaewa Dilärä
El direktorı: Xanafin Ayaz
El klubı: «Sälät-Tübän Kama» klubı ( Möxämädşina Elwina)
El kuldaşları: Galiew Daniyar, Şakirowa Aygöl
El initsiatiwası: «Çeltär» media mäktäbe (proekt citäkçese: Şäripowa Renata)
El alanı: «Sälät-Saba» (direktor - Gölnaz Gatina, ölkän äydaman – Gölüsä Arikeewa)
Sälät stipendiyase: Xanafin Ayaz, Zäynullina Läysän
El partnerı: «Aznakay» sanatoriy-profilaktorie häm anıñ baş tabibı Röstäm Ibrahim ulı Däülätşin; Rossiyaneñ maktaulı energetigı, Tatarstannıñ atkazangan artistı, Başkortstannıñ atkazangan mädäniyat xezmätkäre, Tuymazı şähäreneñ şäräfle şäxese, «Ilfa» CÇC direktorı – Fänir Gıylmetdin ulı Galimow; 
El ostazı: Rimma Ibrahimowa
Forum başcitäge: Liliya Akberowa
Sälät cırlıy: «Ruxi yöräk». Başkaruçı, süz häm köy awtorı: Dinä Wäliewa.

Awtor: Inzilä Xösäinowa

Tulırak:http://shahrikazan.ru/news/yazmalar/slt-kyzdyra-yaki-smrukh-premiyasen-kemnr-laekly