Онлайн-шәмчекләр, 19 мең сәлкеш һәм татарча 100 сүз: быелгы «Сәләт» җәе тагын ниләр белән истә калыр?

24.09.2020

19 meñ sälkeş tä isän-sau, altı smena da tınıç ütte – iñ möhime şul. Şaktıy üzençälekle 2020 elnıñ “Sälät” cäenä “Tatar-inform”da uzgan matbugat oçraşuında änä şundıy näticälär yasaldı.

Bıel “Sälät” alannarı üz eşçänlegen iyul aenda gına başlap, Tatarstan belän genä çiklängän. Şulay da, başka töbäk häm illärdäge sälkeşlär yaratkan moxitlärennän mäxrüm kalmagan: alannarga cide meñ eget häm kız kilsä, 12 meñ bala çaralarnı onlayn küzätkän. “Sälät” yaşlär üzäge direktorı Aygöl Gabraxmanowa süzlärençä, bıel smenalarda töp igtibar kurkınıçsızlık tälaplärenä birelgän:
– Bu el, çınnan da, şaktıy üzençälekle buldı: bez axırgaça “sälät”le cäyneñ kayçan başlanuın belmädek, inde smenalar bötenläy bulmas dip tä borçıldık. Tieşle organnarnıñ citdi küzätüe astında, sanitar-epidemiologik tälaplärne ütäp, respublika alannarı balalarnı cıya aldı. Ä iñ söendergäne – naçar näticälär bulmadı, barısı da tınıç ütte, – dip söyläde ul.
“Sälät”lelär bıel kıyulıkların da rasladı: oeştıruçılar süzlärençä, çatırlı smenalar başka töbäklärdä bötenläy uzmagan.
– Bıel 22 çatırlı smena uzdı. Başka töbäklärdäge alannarıbız da, sälkeşlärez dä eşçänlektä tereläy katnaşa almadı. Xäer, çittän kilä almauçılar öçen bez onlayn-mäydançık buldırdık, şul räweşle bezne 12 meñ keşe küzätte. Başka ellarda 18 meñ sälkeş katnaşsa, bıelgı cäyge çaralarga 19 meñ katnaşuçını cälep ittek, – dide “Sälät”neñ cäyge alannar koordinatorı Igor Smirnow.
“Sälät”neñ uku-ukıtu eşçänlege belän dä bäyle yañalıklar bar. Alar turında “Sälät”neñ mägarif üzäge citäkçese Dilärä Yakubowa:
– Bezneñ bıelgı iñ zur uñışlarıbıznıñ berse – “Sälät” mäktäbe açıluı. Ul şähärneñ 51 nçe mäktäp bazasında urnaştı. Bügengä berençe sıynıfta 11 bala belem ala, – dide ul. – Programmaga kilgändä, alar däülät standartları buença häm öç teldä ukıy. Balalarnı törle yaklap üsterü öçen, östämä däreslär, ostaxanälär dä karalgan. Kiläçäktä ber sıynıf belän genä çiklänmiçä, tulı ber mäktäp açarga xıyalannabız.
Oçraşuda tel mäsäläsenä dä tuktaldılar. Aygöl Gabdraxmanowa süzlärençä, “Sälät”kä kilgän balalarnıñ 90% wakıtı tatar telendä aralaşıp ütä:
– Bez balalarnıñ telne belü-belmäülärenä artık basım yasamıybız. Öyränergä telägeñ barmı – räxim it! Älbättä, berniçä kön eçendä genä bez tatar telendä kamil söyläşergä öyrätä almıybız. Ämma bezgä kilgännär kim digändä yöz tatar süzen üzläşterep kitä. Hiçyugında kiçke çaralar, üzara aralaşu, cırlar häm başkası balada tel belän kızıksınu, anı añlarga tırışu telägen uyata.

Liliya Gıymazowa

Çıganak: https://vatantat.ru/2020/09/35291/


Wozwrat k spisku