Премия «СӘМРУХ»: кто победил?

20.02.2020

2015 eldan başlap, «Sälät» yaşlär ictimagıy fondı Tatarstan Xökümäte yardäme belän aktiw balalarnı, yaşlärne, ostazlarnı, alannarnı häm «Sälät»Klubların «Sämrux» el premiyase belän büläkli. Dimäk, bıel älege çaranıñ biş ellık yubilee digän süz! Şul säbäple  ul 19 fewral könne masştablı räweştä «Piramida» mädäni-küñel açu üzägendä uzdırıldı.

Premiyaneñ maksatı isä – «Sälät» xäräkätendä katnaşuçı balalarnı häm yaşlärne büläkläü, «Sälät» aktiwistlarınıñ, partnyorlarınıñ, «Sälät»proektları awtorlarınıñ häm oeştıruçılarnıñ eşenä tieşle bäya birü! 

– «Sämrux» premiyasenä äzerlek cäy tämamlanuga başlanıp kitä. Közen isä saylap alu etapları uza. Şulay itep tantananıñ üze turında da uylana başlıybız: kemne çakırırga? Kunaklarnı, «Sälät»lelärne niçek şakkattırırga?.. Fälsäfi yaktan äytsäk, älbättä, el bue äzerlänäbez, çönki bu – «Sälät» öçen elnıñ kulminatsion noktası, näticälär yasau wakıtı, – di älege çara turında «Sälät» yaşlär üzäge direktorı Aygöl Gabdraxmanowa.

Premiya isä, yugarıda äytelgänçä, köz köne başlanıp kitkän etaplarda uza. Berençe baskıç – garizalar kabul itü bulsa, ikençesendä katnaşuçılarnı portfolio nigezendä saylap algannar. Iskärtep uzarga kiräk, bıel älege bäygegä 300 garizanıñ barı tik 50se genä ütä häm alar arasınnan yanädän iñ-iñnäre genä “iläk aşa” kiläse etaplarga uza... Öçençe etapka kilsäk – ul katnaşuçılarnı äñgämä nigezendä saylap alu. Dürtençe, soñgı baskıç – büläkläü tantanası...

Şunı äytergä kiräk, «Sämrux-2019» el premiyase yugarı däräcädä, «Sälät»kä genä xas cılı moxittä uzdı. Monda, älbättä, alıp baruçılarnıñ  rolen assızıklap uzarga kiräk. Kabatlanmas  tawış häm diktsiya iyase, jrnalist, Tatarstannıñ atkazangan artistı Gölnaz Säfärowa häm süzgä kesägä kermäüçe “Tatar radio”sı alıp baruçısı Ramil Şäräfiew üz eşläreneñ ostaları ikänlegen  tagın ber kat isbatladılar.

Biredä şulay uk därtle cırlar, fälsäfi biyulär, katlı-katlı kotlau, räxmät süzläre häm, älbättä, kabatlanmas xis-kiçereşlär... barısı da  ber flakonda ide!  Mäsälän, Elmir Nizamow çıgışın misal itep alıyk. Biredä professional däräcädäge cır-moñ  simwolik mägnägä iya, başta oçınıp toruçı, azaktan zur ekrannarga “küçkän”  kızıl tukıma, hiçşiksez, igtibarnı üzenä cälep itä. Irekle icat itüne, sälätne törleçä kürsätep bulunı yanädän isbatlıy ul. «Sälät»neñ üz cırları da şulay uk maktauga laek: härber alanga, klubka, forumga bagışlangan ör-yaña tekä xitlar! Afärin!

«Sälät» proektları citäkçese Cäüdät Söläymanow älege zur tantana artında nikadär  köç, tırışlık häm berdämlek yatuın da iskärtep uzdı.

– Traditsiya buença bez bişençe tapkır iñ akıllılarnı, citezlärne bilgelibez. Şuña kürä dä tantananıñ iñ möhim öleşe – ul meñnär arasınnan el bue «Sälät»ne üsterü öçen zur tırışlık kuygan sigez börtekne saylap alu. Akkoş oyasında akkoş tua, dilär. Äti-änilärgä şundıy ziräk balalar birgännäre öçen räxmät, - di Ädip Älmir.

Bıel isä sigez töp nominatsiyadän tış «Forum başcitäge» dip isemlängän yaña yunäleş tä barlıkka kilgän. «Bu nominatsiyagä illeläp keşe urın tottı. Ämma ul keşe ürnäk, yaxşı abıy häm üz eşeneñ ostası bulırga tieş ide. Anıñ iseme – Räfis Xälilow», – dip ciñüçene iglan itte «Sälät»neñ unınçı prezidentı Igor Smirnow.

Ciñüçelärgä diplomnar, «Sälät» partnerlarınnan istälekle büläklär häm fund.selet.biz kraudfanding platformasında tuplangan akçalata prizlar tapşırıldı.

Menä ul Ädip Älmir äytkän “sigez börtek”:

«El sälkeşe» – Rälinä Fawarisowa;

«El äydamanı» – Gölnaz Gatina;

«El ölkän äydamanı» – Zärinä Xälilowa;

«El direktorı» – Alsu Ganeewa;

 «El kuldaşları» – Ädilä Kamalowa häm Ilnur Zinnätow;

«El klubı» – «Sälät-Yaşel Üzän» klubı;

«El alanı» – «Sälät Yar Çallı» alanı;

«Sälät cırlıy» – «Sälät dönyası» cırı (Awtor başkaruçı: Miläüşä Gomärowa).


Çıganak: «Yalkın»

Awtor: Ilüzä Kasıymowa


Wozwrat k spisku